Жубайы Жибекти атып өлтүргөн жаран өмүр бою эркинен ажыратылды

Бишкекте Жибек Урустемованы атып өлтүргөн жолдошу У.Б.га сот өкүмү чыкты. Бул тууралуу Бишкек шаардык сотунун басма сөз кызматы билдирди.

Маалыматка ылайык, Свердлов райондук сотунун 10-июлдагы өкүмү менен айыпталуучу У.Б. (жолдошу) Кылмыш-жаза кодексинин 122-беренесинин 2-бөлүгүнүн 7-пункту (Өзгөчө мыкаачылык менен адам өлтүрүү) боюнча күнөөлүү деп табылып, өмүр бою эркинен ажыратылды. Ошондой эле мүлкү конфискацияланды.

Мындан тышкары, ал Кылмыш-жаза кодексинин 138-беренесинин 2-бөлүгүнүн 2-пункту (Уруп-сабап кыйноо) боюнча дагы күнөөлүү деп табылып, 5 жылга эркинен ажыратуу жана мүлкүн конфискациялоо жазасы дайындалды.

Кылмыш-жаза кодексинин 77-беренесинин негизинде дайындалган жазалар жарым-жартылай кошулуп, акыркы жаза катары У.Б. өмүр бою эркинен ажыратылып, мүлкүн конфискациялоо өкүмү чыгарылды. Ошондой эле соттун чечими менен жабырлануучу У.Б.нын (2006-жылдын 12-сентябрында туулган) пайдасына моралдык зыяндын ордун толтуруу үчүн 1 миллион сом өндүрүлдү.

Айта кетсек, өткөн жылы декабрда Бишкектеги батирлердин биринде жолдошу аялын тапанча менен атып өлтүргөн окуя катталган. Шектүү дароо кармалган. Ал 48 жаштагы маркумдун мурунку жолдошу, мурун укук коргоо органдарында иштеген жаран болуп чыккан.