Бишкекте кытайлык жумушчуларга мыйзамдарды сактоо боюнча түшүндүрүү иштери жүргүзүлдү

Бишкек шаардык милициясы чет өлкөлүк жарандар арасында профилактикалык иштерди күчөттү. Бул жолу түшүндүрүү иштери Кытайдын жарандары эмгектенген 12 курулуш компаниясында өткөрүлдү.

ИИББдин кызматкерлери чет элдик жумушчуларга Кыргызстандын миграциялык мыйзамдарын, коомдук тартипти сактоо талаптарын жана коомдук жайлардагы жүрүм-турум эрежелерин түшүндүрүштү. Ошондой эле кыргыз элинин каада-салтын, маданиятын жана үрп-адаттарын урматтоо зарылдыгы белгиленди.

Милиция өкүлдөрү коомдук тартипти бузуу, мушташтарга катышуу жана башка мыйзамсыз аракеттер жоопкерчиликке алып келерин эскертишти. Мыйзам талаптарын бузган чет өлкөлүк жарандарга айып пул салынып, өлкөдө болуу мөөнөтү кыскартылышы же Кыргызстандан чыгарылышы мүмкүн.

Мындан тышкары, өлкөдө жүрүү эрежелерин бузган жарандарга «Жашыл коридор» акциясынын алкагында өздөрүнүн укуктук макамын мыйзамдаштыруу мүмкүнчүлүгү тууралуу маалымат берилди.