Ысык-Көлдөн жарым жылда 50 миң метрден ашуун эски торлор чыгарылды (видео)

2026-жылдын биринчи жарым жылдыгында Жаратылыш ресурстары, экология жана техникалык көзөмөл министрлиги Ысык-Көлдөн 50 миң метрден ашуун эски синтетикалык балык уулоочу торлорду чыгарды. Бул тууралуу министрликтин Ысык-Көл аймактык башкармалыгынын башчысы Кылычбек Тентимишев билдирди.

Анын айтымында, өткөн жылы бул көрсөткүч бир жыл ичинде 47 миң 500 метрди түзгөн. Мындан сырткары, быйыл көлдө балыктардын саны көбөйүп, алардын көлөмү да чоңойгону байкалган.

Ошол эле учурда министрлик жыл башынан бери Ысык-Көлдөн 1 тонна 250 килограмм таштанды чыгарган. Таштандылардын арасында гантель, гиря, унаалардын дөңгөлөктөрү, амортизаторлор жана башка буюмдар болгон.
"Көлдөн чыгарылган бардык таштандылар топтолуп, Бишкек шаарындагы таштанды өрттөөчү заводго жеткирилип, ошол жерден жок кылынат",- деп кошумчалады Тентимишев.