Улукбек Карыбек уулу: "Аскерлер жаңы батирлүү болмоюнча көзөмөлдө болот"  

Бүгүн, 27-июлда Жогорку Кеңештин депутаты Улукбек Карыбек уулу Кыргыз Республикасынын Абадан коргонуу күчтөрүнүн 20 жылдык мааракесине арналган иш-чарага катышып, мекен сакчыларын кесиптик майрамы менен куттуктады. Бул тууралуу Жогорку Кеңештин басма сөз кызматы билдирди.

Депутат өз сөзүндө Абадан коргонуу күчтөрү өлкөнүн коопсуздугун камсыз кылган ишенимдүү калкан экенин белгилеп, акыркы жылдары мамлекет тарабынан аскер кызматкерлеринин социалдык жана кызматтык шарттарын жакшыртууга көңүл бурулуп жатканын айтты.

Ошондой эле эл өкүлү аскер кызматкерлерин турак жай менен камсыз кылуу маселесине өзгөчө токтолду. Анын айтымында, мекен коргоочулар жана алардын үй-бүлөлөрү мамлекеттин камкордугун сезиши керек.

Улукбек Карыбек уулу "Аскер кызматчыларынын статусу жөнүндө" мыйзамда каралган турак жай менен камсыз кылуу талаптары аткарылышы зарыл экенин белгилеп, аскер кызматкерлери жаңы батирлерге ээ болгонго чейин бул маселе депутаттык көзөмөлдө болорун билдирди.