Таиландда өлтүрүлгөн орусиялык туристтердин сөөгү жакындарына берилди

Бүгүн, 5-августта Таиландда өлтүрүлгөн 22 жаштагы орусиялык кыз менен анын жашы жете элек инисинин сөөгү жакындарына өткөрүлүп берилди. Бул тууралуу орусиялык маалымат каражаттары жазып чыгышты.

Маркумдар менен коштошуу аземи 6-августта өтөт. Анда орусиялык туристтер менен катар аларды өлтүргөн кылмышкерлердин колунан каза болгон тай үй-бүлөсүнүн 3 мүчөсү да эскерилет.

Эске салсак, 22 жаштагы орусиялык кыз жана анын жашы жете элек иниси 26-июлда Паттайяда дайынсыз жоголгон. Кийин полиция кылмышка шектелген 2 кишини кармаган. Алар туристтердин мотоциклин уурдоого аракет кылышканын, жаштар каршылык көрсөткөндөн кийин инисин атып, эжесин сабап өлтүрүшкөнүн моюнга алышкан.

Орусиялык туристтердин өлүмүнөн кийин Таиланд бийлиги туристтердин коопсуздугун күчөтүүнү убадалаган.