Ысык-Көлдө атайын унааларга жол бербеген айдоочулар аныкталууда

Ысык-Көл облусунда жол кыймылынын коопсуздугун камсыздоо жана тез жардам, өрт өчүрүү сыяктуу атайын кызматтардын унааларынын тоскоолдуксуз жүрүшүн камсыз кылуу максатында «Маяк» алдын алуу иш-чарасы өтүүдө. Бул тууралуу ӨКМден билдиришти.

Иш-чаранын алкагында Ысык-Көл ОИИБдин ЖКККБ кызматкерлери ӨКМ жана Тез жардам кызматынын өкүлдөрү менен биргеликте Каракол шаарында рейд өткөрүштү.

Рейд учурунда атайын жарык жана үн сигналдары күйгүзүлгөн кызматтык унааларга жол бербеген айдоочулар аныкталды. Аларга карата укук бузуулар жөнүндө протоколдор түзүлүп, тиешелүү айып пулдар салынды.

Мындан тышкары, айдоочуларга атайын кызматтардын унааларына жол берүү тартиби жана өзгөчө кырдаалдарда алардын тоскоолдуксуз өтүүсүн камсыз кылуунун маанилүүлүгү түшүндүрүлдү.

Жол кыймылынын коопсуздугун камсыздоо кызматкерлери айдоочуларды атайын сигналдары күйгүзүлгөн кызматтык унааларга өз убагында жол берүүгө чакырышат.