18 жаштагы жигит Мбаппени уурдоону пландаган деп шектелүүдө

Францияда 18 жаштагы Клеман Л. башында турган кылмыштуу топ атактуу футболчу Килиан Мбаппе жана дагы 25 адамды уурдоону пландаган деп шектелүүдө. Бул тууралуу француз басылмалары, анын ичинде Le Parisien жазды.

Тергөөнүн жүрүшүндө шектүүнүн эки телефонунан футболчуларга, рэперлерге, зергерлерге, ишкерлерге жана башка бай адамдарга тиешелүү даректер табылган. Жалпы тизмеде 26 потенциалдуу жабырлануучу болгону айтылууда. Алардын арасында "Реал Мадриддин" жылдызы Килиан Мбаппе да болгон.

Клеман Л. кылмыштуу топту социалдык тармактар аркылуу башкарганы айтылууда. Ал буга чейин башка кылмыштарга байланыштуу кармалган. Учурда ал катуу көзөмөлдөгү абакта кармалып, иш боюнча тергөө уланууда.