Айгүл Жапарова Кырчындагы сүрөттөрү менен бөлүштү

Өлкөнүн биринчи айымы Айгүл Жапарова соцтармактагы баракчасына Ысык-Көлдүн Кырчын жайлоосуна баргандагы сүрөттөрүн жарыялады.

Ал "Көчмөндөр ааламы" этношаарчасын кыдырып, кол өнөрчүлөрдүн эмгектери менен таанышканын белгиледи.

"Өзгөчө салттуу кол өнөрчүлүктү сактап, аны жаңы эмгектер менен улантып келе жаткан чеберлерибиздин аракети кубандырды. Мындай жарманкелер, алардын эмгеги чет элдик коноктордун кызыгуусун арттырууда. Аба ырайынын шарттарына карабастан, Кырчын жайлоосундагы маанай да өзгөчө сонун.

Бул жерде улуттук маданиятыбыз, көк бөрү, ат оюндары, улуттук каада-салттар жана дүйнөнүн төрт бурчунан келген коноктордун кызыгуусу айкалышып, чыныгы майрамдык маанай өкүм сүрүүдө. Көчмөндөр оюндарына катышып жаткан бардык спортчуларга ийгилик каалайм! Кырчындан башталган бул керемет маанай дүйнөгө кыргыздын кең пейилин, бай маданиятын жана улуу көчмөн рухун дагы бир ирет тааныта берсин", - деп жазды Жапарова.