Курсан Асанов шаардык соттун чечимине нааразы экенин билдирди (видео)

Бүгүн, 10-сентябрда Бишкек шаардык соту "75чилердин каты" боюнча ишти карап, чечим чыгарды. Анда бардык айыпталуучулар 4 жылга эркинен ажыратылганы айтылды. Бирок аларга 2 жылдык пробациялык көзөмөл колдонулду.

Айыпталуучулардын бири Курсан Асанов сот чечимине нааразы экенин билдирди.

"Биздин кыймыл-аракетибизде кылмыштын курамы жок. Баары ойлонуштурулган жомок. Ошондуктан биз даттанабыз",- деди ал.

Эске салсак, 2-июлда Бишкектин Биринчи Май райондук соту резонанстуу "75чилердин" иши боюнча өкүм чыгарган. Аталган ишке айыпталып жаткан 8 адамдын үчөө, тагыраагы, УКМКнын мурдагы башчысы Камчыбек Ташиев, мурдагы баш прокурор Курманкул Зулушев, экс-спикер Нурланбек Тургунбек уулу "Бийликти күч менен басып алуу" беренеси боюнча күнөөлүү деп табылышып, мүлкүн конфискациялоо менен 4 жылга эркиндигинен ажыратылышты. Бирок айыпталуучуларга 3 жылдык пробация жазасы чегерилди.

Ошондой эле аталган берене менен Бекболот Талгарбеков, Эмилбек Узакбаев, Курманбек Дыйканбаев, Аалы Карашев жана Курсан Асанов дагы күнөөлүү деп табылып, 4 жылга абакка кесилишти. Бирок сот аларды 3 жылга үй камагына чыгарды.

Ал эми "Кызмат абалынан кыянаттык менен пайдалануу" беренеси боюнча бардык айыпталуучулар акталышты.