Кыргызстан Азия-Тынч океан аймагында социалдык коргоо жумалыгына катышууда 

Филиппиндин Манила шаарында “Азия-Тынч океан аймагындагы социалдык коргоо жумалыгы – 2026” (Asia-Pacific Social Protection Week-2026) эл аралык иш-чарасы өтүүдө.

Ага мамлекеттик органдардын, эл аралык уюмдардын, өнүктүрүү боюнча өнөктөштөрдүн, жарандык коомдун, жеке сектордун жана академиялык чөйрөнүн өкүлдөрү катышууда.

Агартуу министрлиги 6-октябрда билдиргендей, быйылкы иш-чарада социалдык коргоо системдеринин туруктуулугу, адамдык капиталды өнүктүрүү, азык-түлүк жана тамактануу коопсуздугу боюнча өлкөлөрдүн тажрыйбалары талкууланууда.

Кыргызстандан иш-чарага Агартуу министрлигинин мектептик билим берүү башкармалыгынын жетектөөчү адиси, мектептик тамактануу коалициясынын улуттук координатору Мирбек Рахматилдеев, ошондой эле БУУнун Дүйнөлүк азык-түлүк программасынын Кыргыз Республикасындагы өлкөлүк директору Кожиро Накай жана мектептик тамактануу боюнча программалык саясат боюнча адиси Аида Афтандилова катышууда.

Өлкөдө 2027-жылдын 1-январынан тартып 1-4-класстардын окуучуларынын мектептик тамактануусун каржылоо ченеми бир окуучуга күнүнө 14 сомдон 40 сомго чейин жогорулатылат. Бул чечим мектептик тамактануунун сапатын жана ар түрдүүлүгүн жакшыртууга, ошондой эле үй-бүлөлөрдүн каржылык жүгүн жеңилдетүүгө багытталган.

Иш-чара 8-октябрга чейин уланат.