Өзгөчө булуттар жер титирөөнүн алдын ала белгисиби? (видео)

Бүгүн, 14-октябрда Чилинин Кокимбо аймагына жакын жерде күчү 5,1 баллга жеткен жер титирөө болду. Бул тууралуу чет элдик маалымат каражаттары билдиришти.

Маалыматка караганда, Чилиде октябрь айында бир нече жер титирөө катталды. Кырсыктын алдында асманда өзгөчө формадагы булуттар байкалып, социалдык тармактарда талкуу жаратууда. Колдонуучулар бул көрүнүштү 2023-жылы Түркиядагы кыйраткыч жер титирөөгө чейин пайда болгон булуттарга окшоштуруп жатышат.

Бул көрүнүштөрдөн улам "өзгөчө булуттар жер титирөөнүн алдын ала белгиси болушу мүмкүнбү?" деген суроо жаралууда.

Бирок окумуштуулар мындай булуттарды жер титирөөнүн алдын ала белгиси катары кароого жетиштүү илимий далилдер жок экенин белгилешет.

Метеорологдордун маалыматына ылайык, линза сымал булуттар аба агымдары тоолорду ашып өткөндө пайда болушу мүмкүн. Алар атмосферадагы табигый процесстердин натыйжасы болуп саналат.