14-Февраль - Махабат күнүнө карата уюшулган сынактын жеңүүчүлөрү аныкталды

14-Февраль - Махабат күнүнө карата уюшулган сынактын финалдык баскычы орун алып, шам алдында романтикалык кеч өткөрүүчү түгөйлөр аныкталды. 

SUPER.KG порталында жүргүзүлгөн сурамжылоонун жыйынтыгы боюнча 88 жаштагы Дүйшеке Абышов менен 85 жаштагы байбичеси Какен Абышовалардын сүрөтү менен сүйүү баяны алдыга озуп чыкты. Тилекке каршы, Ысык-Көл облусунун Кашат айылында турушкан карылар кеңсебизге келе алышкан жок. 

Сынактын шарты боюнча, сурамжылоодо 21 катышуучунун ичинен алдынкы орунду ээлеген 3 түгөй жеңиш үчүн күрөшүштү. Алар бири-бирине болгон сезимдерин көрсөтүшүп, чыныгы таттуу түгөйлөр экенин далилдөөгө аракет кылышты. Студиябызда уюшулган чакан сынакта жеңүүчү аныкталып, катышуучуларга майрамдык белектер тапшырылды. Жеңүүчү деп табылган Улан менен келинчеги Динара шам алдында романтикалуу кеч өткөрүүгө мүмкүнчүлүк алышты. 

Кошумчалай кетсек, түгөйлөрдүн ысымдары сурамжылоого 7-февралда коюлган. Мыкты сөздөр менен сүйүүсүн кагаз бетинде баяндап, оригиналдуу сүрөткө түшүп, бизге жолдогондордун саны 21ди түзгөн. Сурамжылоо 12-февралда саат 17:00дө токтотулуп, алдынкы 4 түгөй финалга жолдомо алган.