Бишкекте германиялык дарыгерлер үстүнкү эрини жырык жана таңдайы тешик балдарга операция жасашууда

Эне жана баланы коргоо борборунда Германиядан келген доктурлар менен биргеликте үстүнкү эрини жырык жана таңдайы тешик балдарга операция жасалып жатат. Бул тууралуу бүгүн, 8-апрелде аталган борбордун бет-жаак хирургия бөлүмүнүн бөлүм башчысы Алтынбек Мамыралиев маалымдады.

“Бул иш-чара 2003-жылдан бери иштеп келе жатат. Германиядан жыл сайын 2 жумага 3 бет-жаак хирургу, 1 стоматолог-ортодонт жана 1 логопед келип кетет. Орто эсеп менен эки жума ичинде 50-60 балага операция жасалат. 150-200гө жакын адам адистерден кеңеш алат”,- дейт бөлүм башчы.  

Маалыматка таянсак, Кыргызстанда төрөлгөн балдардын 650сүнүн ичинен бирөөсүнүн үстүнкү эрини жырык же таңдайында тешиги бар болуп чыгат.