Казакстандык эркин журналист "Казакстанда "Супер-Инфодой" гезитти чыгаруу оңой эмес" дейт

Бүгүн, 28-майда кеңсебиздин босогосун аттагандардын бири казакстандык эркин журналист Аскар Актлеуов болду. Ал “Супер-Инфо” гезити тууралуу интернеттеги социалдык тармактардан сураштырып билип, Кыргызстанга жол түшкөндө гезиттин жамааты, иши менен таанышып келүүнү ниет кылып жүргөнүн айтат. Боордош элден келген конок кызматкерлер менен таанышып, эстеликке сүрөткө түшүп, бир катар өзүн кызыктырган суроолоруна жооп алды.  

Аскар мырза 11 жыл мурун түйшүктүү тармак болгон журналистикага аралашып, учурда Борбордук Азияда ММКлар боюнча анализ жүргүзүп жүрөт. Анын айтымында, Казакстанда мамлекетке караштуу гезитти эске албаганда, 100 миңден ашык нускада жарык көргөн гезиттер жок. "Мамлекеттик гезит казак жана орус тилинде чыгат жана мугалимдерге, пенсионерлерге мажбурланып берилгендиги үчүн нускасы көп" деп күлүп алды боордошубуз. “Кыргызстанга келгенимде өнүгүп келе жаткан SUPER.KG порталы менен 100 миңден ашык нускада бир нече жылдан бери кармалып келе жаткан “Супер-Инфо” гезитинин ишмердүүлүгү тууралуу билүүгө ашыктым",- дейт коногубуз. Эне тилинде гезитти “Супер-Инфо” сыяктуу көп нускада чыгаруу оңой иш эмес экенин баса белгиледи Аскар мырза.     

Маалымат үчүн айта кетсек, Аскар Актлеуов кесиби боюнча юрист. Журналистика тармагында эмгек жолун 2003-жылы радиодо баштаган. Андан соң теле жаатында да эмгектенген. 2010-жылдан тарта эркин журналист катары эмгектенип келет.