Гейлер жана лесбиянкалар “гей-пропагандага тыюу салуу жөнүндөгү” мыйзам долбоорун артка чакыртып алуу боюнча Жогорку Кеңешке кат жолдошту 

Бүгүн, 28-майда Кыргызстандагы ЛГБТИКС (лесбиянкалар, гейлер, бисексуалдар, трансгендерлер, интерсексуалдар, квирлер, союзниктер) уюмдарынын өкүлдөрү КРнын Жогорку Кеңешине бачабаздыкты (гомосексуализмди) жайылтуу жосундарына тыюу салууга багытталган мыйзам долбоорун артка чакыртып алуу боюнча кайрылышты. Бул тууралуу “Лабрис” уюмунун басма сөз кызматы жарыялады.

Маалым болгондой, аталган уюмдардын өкүлдөрүнөн 60тан ашуун кат түштү. Каттар ЖКнын депутаттары Төрөбай Зулпукаров, Курманбек Дыйканбаев жана Улукбек Кочкоровго даректелгени анык болду.

“ЛГБТИКСтин өкүлдөрү “гей-пропагандага тыюу салуу жөнүндөгү” мыйзам долбоору кабыл алынса, бачабаз адамдарга карата зордук-зомбулуктун өсүшүнө чоң таасир тийгизерин белгилешти. Мисалы, апрель айынын башында бейтааныш жигиттер батирге кирип, 5 гомосексуалды токмоктошкон. Бул иш-аракет алдын ала пландалганы анык болгон. Мындан тышкары акыркы 2 айдын ичинде укук коргоочулар тарабынан да ЛГБТИКтин өкүлдөрүнө зордук-зомбулук көрсөтүлгөнү белгилүү”,- деп билдирди “Лабрис” уюму.

Эскерте кетсек, 2014-жылдын 7-апрелинде "Калыс" кыймылынын лидери Жеңиш Молдокматов "аталган мыйзам долбоор иштелип чыкты" деп айткан.