"Ош облусунда ажыга баруучуларды тандоочу чүчү кулак компьютердин жардамы менен адилеттүү өттү" дешет казылар

Ош облусу боюнча ажыга баруучуларды тандоодо чүчү кулак ачык-айкын өттү. Мындай билдирүүнү бүгүн, 8-июлда өткөн маалымат жыйынында Ош облусунун бир катар райондорунан келген казылардын орун басарлары билдиришти.

Алардын бири Ош облусунун казысынын орун басары Абдыжапар Жакыпов компьютердик чүчү кулак замандын талабы экенин айтып: “Келинчегим экөөбүз чүчү кулакка катышканбыз, тагдыр экен, мага чыкпай, аялыма чыгып калды. Эгер коррупциялык схемага салсак, муфтияттан тааныш-билишке салып, аялыма кошулуп алсам болмок. Бирок биз чүчү кулакты компьютердин жардамына салган болсок, анда ага баш ийишибиз керек”,- деди.

Ал эми журналисттердин “Өтпөй калгандардын 500 сомдон төлөгөн акчасы кайтарылып берилеби?” деген суроосуна казынын орун басары “жок, кайтарылбайт” деген жообун узатты.