Израиль Кыргызстанга заманбап технологиялар, саламаттыкты сактоо жана айыл чарба тармактарын өнүктүрүүдө жардам көрсөтүшү мүмкүн

Кечээ, 8-сентябрда КРнын Экономика министри Темир Сариев “Евразия-2” департаментинин башчысы, Израилдин тышкы иштер министри О.Йосеф менен жолугушуп, эки тараптуу кызматташууну талкуулашты. Бул тууралуу КРнын Экономика министрлигинин басма сөз кызматы билдирди.

Маалыматка ылайык, иш-чаранын жүрүшүндө О.Йосеф мырза Кыргызстанда ардактуу консулдук институтун ачуу керектигин баса белгиледи. Мындан тышкары ал кыргыз тарап менен бир нече тармакта тажрыйба алмашууга даяр экендигин билдирди. Тактап айтканда, Израилдин мыкты болуп саналган саламаттыкты сактоо, заманбап технологиялар, айыл чарба жана мелиорация тармактары боюнча Кыргызстан тажрыйба ала алат.

КРнын Экономика министри Т.Сариевдин айтымында, соода-экономикалык кызматташтыктын деңгээли начар болууда. Жолугушуунун жүрүшүндө ал өкмөттөр аралык келишимдерди жана мекемелер аралык меморандумдарды бекитүүнү сунуштады.