Көчмөндөр оюндары өтүп жатканда 600гө жакын адам медициналык жардам алышты

Көчмөндөр оюндары өтүп жаткан учурда 600гө жакын адам медициналык жардамга ээ болушту. Бул тууралуу бүгүн, 16-сентябрда КРнын Саламаттыкты сактоо министрлигинин басма сөз кызматы жарыялады.

Маалыматка ылайык, Ысык-Көл облусунда I Бүткүл дүйнөлүк көчмөндөр оюндары өтүп жатканда медициналык жардам берүү боюнча 12 топ иштеп жатты. Алар оюндар орун алган жерлерде жана унаа трассаларында жайгашышкан. Чолпон-Ата шаарындагы ипподромдо жана Кырчын жайлоосунда 2 медициналык түйүн ачылган.

Мындан тышкары жалпысынан 80 медициналык кызматкер тартылып, алардын 26сы Бишкектин илимий медициналык борборлорунан жөнөтүлгөн. “Медициналык жардам суткасына 24 саат бою көрсөтүлүп жатты. Бул кызматтарга кайрылгандардын саны 590го тең болду. Алардын экөөсүн жандандыруу топтору стационарларга жеткиришти”,- деп билдирди Саламаттыкты сактоо министрлиги.