Бүгүн Ош шаарында күнүгө 160 даана кир жуугуч машина чыгаруучу заводдун ачылыш аземи өтөт

Ош шаарында бүгүн, 1-декабрда кыргыз-кытай биргелешкен “Жим-Мей” кир жуугуч машиналарды чыгаруучу ишкананын расмий ачылыш аземи өтөт. Бул тууралуу мэриянын басма сөз кызматынан билдиришти.

Маалым болгондой, заводдо эмгектенген адистер башында 50 даана жарым автомат машина чыгарса, кийинчерээк анын саны 160 даанага жеткен. Ал эми жакынкы убакыт аралыгында күнүгө 200гө жакын кир жуугуч машина чыгаруу пландалууда. Жарым автомат үлгүсүндөгү кир жуугучтун даанасы 95 доллардан сатылмакчы. Белгилүү болгондой, кир жуучу машиналар жакынкы убакыт аралыгында Кыргызстандын базарларына чыгат. Андан соң алар Тажикстан жана Өзбекстанга да экспорттолмокчу.

Эске салсак, буга чейин Ош шаарынын вице-мэри Замир Аскаров завод 2 этап менен ишке киргизилип, биринчи этапта жалаң кир жуугуч машиналар, ал эми 1-2 жылдан кийин муздаткычтар да чыгарыларын маалымдаган. Кыргыз-кытай биргелешкен “Жим-Мей” заводун ишке киргизүүгө 5 миллион доллар каражат сарпталган.