"Лондондогу аукциондо 390 миң долларга сатылган зер буюмдар Кыргызстандан мыйзамсыз чыгарылган" дешет Маданият министрлигинен

“Лондондо аукциондо сатылып кеткен зер буюмдарды Кыргызстандан чыгарып кетүүгө Маданият министрлиги эч кандай документтерди берген эмес. Бул зер буюмдар маданий мурастарга таандык болгон соң, аны чет жакка алып кетерден мурда биздин министрликтен уруксат алууга тийиш болчу. Чынында, зер буюмдардын ээси Словакияга кетерде ал буюмдардын сүрөтү менен кайрылган экен, бирок аны алып кетүүгө эч кандай уруксат кагаздарын алышкан эмес болчу”,- дейт М.Соляной.

Маалым болгондой, учурда бул ишти иликтөө үчүн Маданият министрлигинде 10го жакын кишиден турган комиссия иш алып барууда.     

“Учурда "бул зер буюмдар Бажы кызматынан баалуу эмес деп эсептелип коё берилиши мүмкүн" деген божомолдор болууда. Бул маселе боюнча бир катар иликтөө иштери жүрүүдө. Комиссиянын жүргүзгөн иштеринин жыйынтыгы менен Лондонго нота жиберүүнү пландап жатабыз”,- деп кошумчалады М.Соляной. 

Эске салсак, “Үмүткор” аталыштагы зер буюмдары Лондондогу белгилүү "Сотбис" аукционунда 3-декабрь күнү 390 474 долларга сатылган болчу. Ал кыргыз үй-бүлөсүндө бир нече кылымдан бери сакталып келгени маалым.