Ошто "31 жаштагы келинди өлтүргөн" деп шектелип кайненеси, күйөөсү, кайнежеси жана анын күйөөсү кармалды

Ошто адам өлтүрүү фактысына шектелип 4 адам кармалды. Бул тууралуу бүгүн, 19-декабрда Ош ШИИБинин басма сөз кызматы билдирди.

Маалыматка караганда, 2012-жылдын 4-сентябрь күнү 1981-жылы туулган Наргиза Хамидованын жансыз денеси Фергана облусунун аймагынан табылган. Бул боюнча эки жылдан ашуун иликтөө иштери жүрүп, кылмышка шектүү катары өлгөн келиндин кайненеси, күйөөсү, кайнежеси жана анын күйөөсү кармалган. Алар 2012-жылдын 2-сентябрында Ош шаардык ооруканасында массаж жасап иштеген Наргизаны өлтүрүшүп, Араван районундагы Өзбекстан тарапка кетүүчү каналга салып жиберишкен. Аны өлтүрүүнү кайын журту чогуу кеңешип чечишкен. Ал тургай кайненеси өрттөп жиберүүнү сунуш кылган. Кармалгандар келиндин өлүмүнө анын жеңил ойлуулугу себеп болгонун айтышууда. Учурда кылмыш иши козголуп, тергөө амалдары жүрүп жатат.