Баткен облусунун Булак-Башы жайлоосунда белгисиз адамдар 9 турак жайды өрттөп кетишти

Баткен облусунун Булак-Башы жайлоосунда 9 турак жай белгисиз адамдар тарабынан өрттөлдү. Бул тууралуу ӨКМнын басма сөз кызматы бүгүн, 26-декабрда билдирди.

Маалыматка караганда, 24-декабрь күнү саат 19:00 чамасында Баткен облустук өрткө каршы башкармалыгына Баткен районунун Кара-Булак айыл өкмөтүнүн Булак-Башы жайлоосунда элдин жайкы мезгилде убактылуу жашап туруучу 9 турак жайы күйүп кеткендиги жөнүндө ыкчам маалымат келип түшкөн.

Маалыматка ылайык:

1. 1980-жылы туулган Акынбек Назаралиевдин 2 бөлмөлүү эки турак үйү;

2. 1970-жылы туулган Абдыллажан Улукбековдун 3 бөлмөлүү турак жайы жана 1 мал сарайы;

3. 1972-жылы туулган Сайдахмат Тиллабаевдин 2 бөлмөлүү турак жайы;

4. 1973-жылы туулган Элчибек Тайлановдун 2 бөлмөлүү турак жайы, 1 бөлмөлүү ашканасы жана 1 бөлмөлүү отунканасы;

5. 1977-жылы туулган Маматжан Жаркыновдун 1 бөлмөлүү турак жайы;

6. 1976-жылы туулган Ачылбек Жаркыновдун 1 бөлмөлүү турак жайы;

7. 1971-жылы туулган Мансур Тиллабаевдин 2 бөлмөлүү турак жайы, 1 бөлмөлүү ашканасы, 1 бастырмасы;

8. Нарбек Султановдун 3 бөлмөлүү турак жайы, 1 ашканасы, 1 мал сарайы өрттөлгөн.

Жалпысынан Булак-Башы жайлоосунда 8 жарандын 9 турак жайы атайын өрттөлгөндүгү аныкталып, атайын өрттөө фактысы боюнча кылмыш иши козголгон. Булак-Башы жайлоосу Тажик Республикасынын Ворух аймагынан 12 чакырым аралыкта жайгашкан. Учурда келтирилген чыгымдар эсептелүүдө.