"Айылдашы эле күйөөмдү сабап, зордуктаптыр" дейт жабырлануучунун аялы

Үстүбүздөгү жылдын 7-январынан 8-январына караган түнү Сокулук районундагы Конуш айылынын тургундары 43 жаштагы Нурлан Амановду ур-токмокко алышкан. Анын кесепетинен жабырлануучу ооруканадан каза тапкан. Тургундар маркумду “ар кимге зордук-зомбулук көрсөтүп, 1972-жылы туулган Рустамбек аттуу айылдашын зордуктаган” деп айыпташууда. Бул боюнча кылмышка шектүү катары 6 адам кармалган, бирок аларды Сокулук райондук соту үй камагына чыгарган.

Бүгүн, 27-январда мына ошол окуя боюнча маалымат жыйыны өттү. Ага зордукталды делген Рустамбек Курманалиевдин аялы, айыл аксакалы жана айыл тургундары катышышты.

Маалымат жыйынына катышкан айыл аксакалы Аспек Молдокулов элдик жазалоодон каза тапкан Нурлан Амановдун үстүнөн 18 арыз түшкөнүн айтты.

“Буга чейин күч органдарына Амановдун үстүнөн 18 жолу арыз түшкөн экен. Бирок Райондук ички иштер башкармалыгы тарабынан эч кандай чара колдонулган эмес. Мунун кесепетинен ушундай окуя болуп отурат. Эгер алдын алса башкача болот беле”,- деди айыл аксакалы.

Ал эми айыл тургуну Айна Абдылдаева: “Нурланды эл жазалаган. Көптөргө кордук көрсөткөнү үчүн эл ушундай жолго барды. Ал жерде 30дан ашык адам болгон. Бирок аялы 6 адамды таанып калгандыктан, алар кармалып, кийин сот аларды үй камагына чыгарган. Ал эми Сокулук райондук прокуратурасы кылмышка шектүүлөрдү үй камагына чыгаруу чечимине каршы болуп, Чүй облустук сотуна арыз менен кайрылган. Биз шектүү 6 адамдын сотко чейин үй камагында болушун талап кылабыз”,- деди.

Зордукталды деген Рустамбек Курманалиевдин аялы Венера Сыдыгалиева буларды айтты: “Мен күйөөм менен 21 жылдан бери чогуу жашайм, 4 балабыз бар. Ал бир канча күн унчукпай, жаман болуп жүрдү. Мен анын зордукталганын кийин билип отурам. Учурда ал оор абалда ооруканада жатат. Элдик жазалоодон улам каза болгон Нурлан Аманов күйөөмдүн башын дубалга уруп, эсин жоготкондон кийин эки колун артка кайрып, жанагы зөөкүрлүк ишин кылыптыр. Азыр ал өзүн өлтүргөндөн да кайра кайтпайт. Амановдордун үй-бүлөсү ошонун баарын түшүнүшөт. Кайра бизди күнөөлөп жатышат. Азыр менин балдарым окууга, бала бакчага да барбай отурушат. Күйөөмдүн зордукталганын экспертиза тастыктаган”.