Бишкекте 7 жашар баланы муунтуп өлтүрүүгө шектелген аялдын өзүнүн да 7 жаштагы кызы бар экени аныкталды

Бүгүн, 3-мартта Бишкектин Биринчи Май райондук сотунда 1-класстын окуучусу Даниэлдин өлтүрүлүшү боюнча биринчи соттук кароо башталды. Соттук кароого айыпталуучу Майрам Акунова жана жабырлануучу тарап Астра Макелеева катышууда.

Сот тарабынан кылмышка шектүүгө бир катар суроолор берилип, анын укуктары түшүндүрүлдү. Кылмышка шектүү буга чейин 1999, 2002, 2013-жылдары соттолгондугун айтты. Андан сырткары өзүнүн 7 жаштагы кызы бар экенин билдирди.

2015-жылдын 10-декабрында милицияга 33 жаштагы Астра аттуу жаран кайрылып, анын баласын белгисиз адамдар уурдап, кайтарып берүү үчүн 150 миң сом талап кылып жатышканын айткан. 11-декабрда аталган кылмышка шектүү катары 39 жаштагы Майрам Акунова аттуу аял кармалган. Анын Жалал-Абад облусунда туулганы, буга чейин уурдоо жана алдамчылык боюнча соттолгону белгилүү болгон. Суракта Майрам Акунова акыркы 10 күн ичинде уурдалган баланын үй-бүлөсү жөнүндө маалыматтарды топтоп жүргөнүн айткан. Тиешелүү экспертизанын жыйынтыгына ылайык, анын акыл-эси жайында экени, ал эми бала дарыдан эмес, муунтулуп өлтүрүлгөнү да аныкталган.