Муунтулуп өлтүрүлгөн 7 жашар баланын апасы анын өлүмүнө шектелип жаткан аялды сот залынан жулмалоого аракет кылды (фото)

Бүгүн, 3-мартта Бишкектин Биринчи Май райондук сотунда 1-класстын окуучусу Даниэлдин өлтүрүлүшү боюнча биринчи соттук кароо өттү. Күбөлөр суракка алынып, эки тараптын көрсөтмөлөрү угулгандан кийин ишти карап жаткан судья ишти 29-мартка жылдырды. Андан соң сот жабык деп жарыяланып, соттун катышуучулары сыртка чыгарылып жаткан учурда темир тордун ичинде отурган айыпталуучу Майрам Акуновага Даниэлдин апасы Астра Макелеева жулкунуп, жулмалоого аракет кылды. Андан сырткары Даниэлдин туугандары да ага карата ачуу сөздөрдү айтышты.

Айыпталуучу аларга: "Балаңарды өлтүргөндү башка жактан издегиле, мен өлтүргөн жокмун. Мен актанып бере алам",- деп кыйкырды.

Кылмышка шектүү буга чейин 1999, 2002, 2013-жылдары соттолгондугун айтты. Андан сырткары өзүнүн 7 жаштагы баласы бар экенин билдирди.

2015-жылдын 10-декабрында милицияга 33 жаштагы Астра аттуу жаран кайрылып, анын баласын белгисиз адамдар уурдап, кайтарып берүү үчүн 150 миң сом талап кылып жатышканын айткан. 11-декабрда аталган кылмышка шектүү катары 39 жаштагы Майрам Акунова аттуу аял кармалган. Анын Жалал-Абад облусунда туулганы, буга чейин уурдоо жана алдамчылык боюнча соттолгону белгилүү болгон. Суракта Майрам Акунова акыркы 10 күн ичинде уурдалган баланын үй-бүлөсү жөнүндө маалыматтарды топтоп жүргөнүн айткан. Тиешелүү экспертизанын жыйынтыгына ылайык, анын акыл-эси жайында экени, ал эми бала дарыдан эмес, муунтулуп өлтүрүлгөнү да аныкталган.