Өзбекстан Республикасынын Премьер-министринин орун басары баштаган делегация Ош шаарына келди

Бүгүн, 26-октябрда “Достук автоунаа жолу” өткөрүү түйүнүнөн Өзбекстандын премьер-министринин орун басары Адхам Икрамов баштаган 120дан ашуун адамдан турган топту вице-премьер-министрлер Мухаммедкалый Абылгазиев, Жеңиш Разаков, өкмөттүн Баткен, Жалал-Абад, Ош облусундагы ыйгарым укуктуу өкүлдөрү, Ош шаарынын мэри Айтмамат Кадырбаев жана башка өкмөт мүчөлөрү баштаган расмий топ тосуп алды. Бул тууралуу Ош шаарынын мэриясы билдирди.

"Иш сапардын алкагында Ошто бир катар маданий иш-чаралар, айыл чарба, азык-түлүк, өндүрүш жарманкеси уюштурулат. Ошондой эле Бабур атындагы драма театрда спектакль коюлуп, Ош шаарындагы жаш активисттер менен жолугушуулар болот. Соңунда эки өлкө ортосундагы кызматташтыкты жакшыртуу, байланышты бекемдөө боюнча документтерге кол коюлат", - деп айтылат маалыматта.

Достукту, ынтымакты бекемдөө максатында үстүбүздөгү жылдын октябрь айында биринчи вице-премьер-министр М.Абылгазиев баштаган 130 адамдан турган кыргыз делегациясы Анжиян шаарына барып, алакаларды жакшыртып, жакшы саамалыктарга күбө болуп келишкени айтылат маалыматта.