Депутат жол коопсуздугуна арналган жыйынга ички иштер министри Улан Исраиловдун келбегенин сындады

Бүгүн, 19-январда Жогорку Кеңештеги “Республика-Ата Журт” фракциясы жол коопсуздугун камсыз кылуу маселелерин жана аны аткаруунун иш-чаралар планын бекитүү боюнча маселени карады. Анда баяндамачылардын бири катары ички иштер министри чакырылган болчу. Бирок ИИМ башчысы Улан Исраилов фракциянын отурумуна келбегендиктен депутат Зарылбек Рысалиев анын бул кадамын сынга алды.

"Биз министрди суроолорго жооп алыш үчүн эле чакырбайбыз. Маселени чечүүнүн жолун табуу үчүн министрди чакырып жатабыз. Абалды көрүп жатабыз. Жол кырсыктары өсүп жатат. Эмне үчүн министр өзү келбейт. Менин министрдин өзүнө суроом бар болчу. Ал эмне, бизди тоготпогонубу? Кайсы жерге барбайлы, министрдин орун басары Курсан Асанов келип жатат. Анда Курсан Асановду эле министр кылып коёлу", - деди Рысалиев.

Жол кырсыктары боюнча баяндама жасаган вице-премьер-министр Дайыр Кенекеев жана ИИМ башчысынын орун басары Курсан Асанов министр Улан Исраилов ооруп калгандыктан жыйынга келбей калганын айтты.

Айта кетсек, Зарылбек Рысалиев 2010-2012-жылдары ички иштер министри болгон.