Баткенде 16 жаштагы кызын зордуктап, анын боюна бүтүп калганын билгенден кийин Орусияга качып кеткенге шектүү адам кармалды

Баткенде кызын зордуктоого шектелген адам Орусиядан кармалды. Бул тууралуу SUPER.KG порталына Баткен ОИИБинин басма сөз кызматынан билдиришти.

Маалыматка ылайык, 2016-жылдын 4-августунда Баткен шаарынын тургуну К.А. милицияга арыз менен кайрылган. Анда 2015-жылдын апрель айында 16 жаштагы Д.Г. аттуу кызды М.Д. аттуу 45 жаштагы атасы зордуктаганын билдирген.

"Аталган факты боюнча М.Д. аттуу адамдын үстүнөн Кылмыш-жаза кодексинин 129-беренеси (зордуктоо) менен кылмыш иши козголгон. Бирок шектүүнүн жүргөн жери белгисиз болгондуктан, 2016-жылдын 16-августунда сырттан айыбы угузулуп, айыпкерге карата Баткен райондук соту тарабынан сырттан камакка алуу түрү тандалып, издөө иши жарыяланган. Ал эми эл аралык издөөдө жүргөн айыпкер М.Д. Орусиядан кармалып, Кыргыз Республикасына ушул жылдын 27-мартында алып келинген. Учурда тергөө иши аяктап, 129-берене менен айыбы угузулуп, кылмыш иши Баткен райондук сотунун кароосуна жиберилди", - дейт басма сөз катчы.

Айта кетсек, Баткен облусунда 16 жаштагы кызын зордуктап жүрүп, кызы кош бойлуу болуп калганда Орусияга качып кеткен жаранга мамлекет аралык издөө жарыяланган болчу. Ички иштер министрлигинин басма сөз кызматы окуя 2015-жылы болгонун билдирген. Анда аялы ооруп, шаарга 2 айга дарыланганга кеткенде 1973-жылы туулган жаран 16 жаштагы кызын зордуктап жүргөн. Кийин кызынын боюнда бар экенин билип, Орусияга чыгып кеткен.

Кылмышка шектүүнүн апасы небересин Тажикстанга алып барып дарынын жардамы менен төрөткөнү маалымдалган. Бала тирүү же өлүү төрөлгөнү белгисиз, ымыркай Марказ айылына алып келинип жерге берилген. Кийин 16 жаштагы кыз катуу ооруп калып дарыланган, бул тууралуу кеп айылга тараган. Окуяны милицияга кылмышкердин аялы билдирип, арыз жазган.