Жээнбеков: "Кол тийбестик боюнча мыйзам Атамбаевге каршы жазылган болсо, мен каршы болмокмун"

Бүгүн, 19-декабрда президент Сооронбай Жээнбеков жыл жыйынтыктоочу маалымат жыйынын өткөрүүдө. Анда экс-президенттин кол тийбестиги боюнча мыйзам долбоору тууралуу суроо берилди.

"Эгер бул мыйзам Алмазбек Атамбаевге каршы жазылган болсо, мен каршы болмокмун. Бирок бул Конституцияга каршы келген жана шейкеш келбеген мыйзамды Конституцияга шайкеш келтирип жатышат. Бизде Конституциянын, мыйзамдын жана соттордун алдында баары бирдей деп жазылган. Ал эми экс-президенттин кол тийбестиги жөнүндө мыйзам 2013-жылы кабыл алынган. Ошол боюнча келе жаткан.

Бул мыйзам мага да тиешелүү. Мен дагы президенттиктен кетем. Ар кимибиз мыйзам алдында бирдей болушубуз керек. Бир жагы бар: экс-президентти кайсы учурда жоопко тартса болору даана жазылышы керек. Президент кезинде адам көп душман табат. Өч алам дегендер көп болот. Ошон үчүн кайсы учурда жоопко тартса болору даана жазылышы керек. Мен эч кимди жоопко тартпайм, жоопко мыйзам, тиешелүү органдар тартат", - деди Жээнбеков.