Депутат Рысалиев: "Өкмөттүн кадр саясатында аймактык теңчилик сакталбай жатат. Талас Кыргыз мамлекетинин курамына киреби?"

Бүгүн, 24-январда Жогорку Кеңештин жыйынында депутат Зарылбек Рысалиев өкмөттүн кадр саясатында аймактык теңчилик сакталбай жатканын айтты.

"Бүгүн жыйынга премьер-министр келет деп айтылды эле келбей калды. Өкмөт башчыдан Талас облусу Кыргыз мамлекетинин курамагындабы деп сурайын дедим эле. Кубатбек Айылчиевич, Таласты Кыргыз өлкөсүнүн курамынан чийип салган эмес белеңер?"- деп депутат вице-премьер-министр Кубатбек Бороновдон сурады.

Кубатбек Боронов: "Талас Кыргыз мамлекетинин курамында экенин сиз деле жакшы билесиз. Болбосо сиз бул жерде отурбайт элеңиз да", - дейт.

Рысалиев: "Талас Кыргыз мамлекетинин курамында болсо, анда эмне үчүн кадр саясатында аймактык теңчилик сакталбайт?" - деп сурады.

Боронов бул маселе эске алына турганын билдирди. "Бул маселе боюнча каралып жатат. Азыркы маселе боюнча айта турган болсок, Бейшеновдун талапкерлиги кесипкөйлүгүн, теориялык билими жогорку экенин карап сунуш берилди", - дейт Боронов.

Рысалиев: "Ошондо премьер-министр экөөңөр таластык жигиттер кесипкөй эмес, билими тайкы, начар адамдар дегени турасыздарбы?" - дейт.

Боронов антип айтпаганын белгиледи.

Учурда парламентте транспорт жана жолдор министринин кызматына Жанат Бейшеновдун талапкерлиги каралып жатат.