Ак Үйдүн артындагы сүмөлөк базары. Бишкектиктер Ноорузду кандай майрамдашты? (фоторепортаж)

Бүгүн, 21-мартта борбор калаанын тургундары Нооруз майрамын белгилешүүдө. Бишкек шаарында майрамга арналган бир катар иш-чаралар уюштурулду.

"Ала-Тоо" аянтында адам көп, өзгөчө сатуучулар. Тамак-аш саткандар бүгүн Панфилов атындагы сейил бактын айланасын ээлеп, ал жерди базарга айландырышты. Сүмөлөктүн базарына айланган парктын ичинде каруселге түшүүнү каалагандар жана курсагын тойгузгусу келгендер кезек күтүп жатышты.

Сүмөлөк саткандардын капчыгы бүгүн бош кетпесине кепилдик бар. Себеби кичинекей желим стакан сүмөлөк 50 сом болсо, 1 литри 250 сомдон сатылып жатты. Сүмөлөк саткан сатуучунун айтымында жыл сайын чоң казан сүмөлөк кайнатып элге бекер таратылып келген. Бирок былтыр ашып калган 1 чака сүмөлөктү сатып жакшы киреше тапканын ачыктады.

"Канча акча түшкөнүн айтпай эле коёюн, бирок жакшы пайда көргөнбүз. Ошол себептен бүгүн 4 чака сүмөлөк алып келдик, соода жакшы болуп жатат. Ары-бери өткөндөр алып кетип жатат, суроо-талап көп", - деди сатуучу.

Андан сырткары, Курманжан датканын айкелинин жанында дипломатиялык жарманке өттү.