Жети-Өгүздө көз жарган 15 жаштагы кыз март айынан бери мектепке барган эмес

Ысык-Көл облусунун Жети-Өгүз районунда көз жарган 15 жаштагы кыз март айынан бери окууга барган эмес. Мындай маалыматты аталган райондун Билим берүү башкармалыгынын башчысы Максат Асанкожоев билдирди.

Анын айтымында, кыздын апасы класс жетекчиге кызынын буту сынып, Бишкек шаарында дарыланып жатканын айтып, дарыгерден алынган маалым катты алып барып берген.

"Кыз март айына чейин сабакка калбай келип жүргөн. Сабакты орто деген бааларга окучу экен. Мектепке дайынсыз келбей жатканынан улам класс жетекчиси менен социалдык педагог үйүнө барган. Кыздын үйүндө эч ким болбогондуктан, ата-энеси менен да көзмө-көз жолуга алышкан эмес. Кийин апасы телефон чалып, кызынын буту сынганын айтып, дарыгердин маалым катын алып барып берген. Ошону менен мектеп жетекчилиги деле бул окуя тууралуу кабар алган эмес.

Ал эми кыз мектепке 7 айлык кош бойлуу болгонуна чейин келип жүргөн. Анын дене-мүчөсү толмочураак болгондуктан эч ким байкаган эмес. Учурда териштирүү жүрүүдө", - деди Асанкожоев.

Ысык-Көл облусунун Жети-Өгүз районунда 15 жаштагы кыз 6-майда көз жарган. Учурда бул окуяга шектелип кыздын кошунасы сурак берип жатат.