"Бири керебеттен кулап, экинчиси тайып жыгылган". Үрөй учурган мушташка шектүүлөр абакта сабалды деген маалыматты четке кагууда

Буга чейин Бишкектеги Жал кичи районундагы үрөй учурган мушташта 2 жигитти катуу сабаганга шектелген бир туугандардын СИЗО-1де сабалгандыгы маалымдалган. Кыйноолордун алдын алуу боюнча улуттук борбордун директору Нурдин Сулаймановдун билдирүүсүнө ылайык, шектүүлөр мындай маалыматты четке кагууда.

"Алар камерада чогуу отургандар менен мушташышты деген фактыны четке кагышууда", - деди Сулайманов.

Айтымында, борбордун кызматкерлери 20-сентябрда кылмышка шектүү бир туугандардан кабар алуу үчүн №47 түзөтүү абагына барышкан. Бирок шектүүлөр алар менен сүйлөшүүнү көп деле каалашкан эмес, мындан улам алар окуянын чын жагдайын айтпай жатышат деген божомолдор бар.

"Кызматкерлер шектүүлөр эч кандай оор жаракаттарды албаганын айтышты. Алардын денеси сыйрылып, колдору ооруксунуп калган, бирок эч жери сынган эмес. Борбордун кызматкерлери мындай абалдын себебин сурашканда, бири керебеттен кулап кеткенин, экинчиси ажатканага бара жатып тайып жыгылганын айтышкан", - дейт Сулайманов.