Сокулукта ажатканага түшүп кетип каза болгон бир туугандар. Окуянын чоо-жайы (фото)

28-сентябрда Чүйдүн Сокулук районундагы Военно-Антоновка айылында 7 жана 13 жаштагы эки бир тууган ажатканага түшүп кетип каза болгон. Окуянын чоо-жайын билүү үчүн каза болгон окуучу балдардын мугалимине байланышканыбызда буларды айтып берди.

Маалыматка ылайык, окуучулар Военно-Антоновкадагы орто мектепте билим алышчу. Кырсык болгон окуя күнү алар мектепке келишип, түштөн кийин үйүнө кетишкен.

"Балдардын ата-энеси жумушка кетишкен экен. Болжол менен саат 14.00 чамасында балдар короодо ойноп жүрүп, бир туугандардын кичүүсү ажатканага түшүп кеткен. Мындан улам бир тууган агасы ага жардам берүүгө аракет кылганда, өзү түшүп кеткен. Ажаткана тактайлардан жасалгандыктан, эскилиги жетип сынып кеткен деген божомолдор айтылууда. Айрым маалыматтарда балдардын жардам сураган үнүн кошуна балдар угуп, "Тез жардам" кызматын чакырган дешүүдө. Бирок алар келгенче балдар думугуп каза болуп калышкан. Биз дагы окуучуларыбыздын мындай тагдырына жаман болуп, нес абалда жүрөбүз", - деди маркумдардын мугалими.