Бишкекте жол тандабас 3 жашар баланы тебелеп кетти. Жабырлануучу ооруканадан каза болду

Бишкектеги көп кабаттуу үйлөрдүн короосунан 3 жашар бала жол тандабастын алдында калып каза болду. Жол кыймылынын коопсуздугун камсыздоо башкы башкармалыгы кырсык 3-ноябрда саат 15:00 чамасында Орозбеков 2 дарегинде жайгашкан көп кабаттуу үйлөрдүн биринин короосунда орун алганын билдирди.

"Тойота Секвойя үлгүсүндөгү унаанын айдоочусу короодо токтоп турган унаасын артты көздөй айдаганда 3 жаштагы баланы байкабай тебелеп кеткен. Бала оор жаракат алгандыгына байланыштуу ооруканадан каза болгон. Бул факт Кылмыштардын жана жоруктардын бирдиктүү реестрине катталып, сотко чейинки өндүрүш иши башталды. Унаа айып аянтчасына токтотулду. Айдоочу Бишкек шаарындагы Абай көчөсүндөгү үйлөрдүн биринде жашайт. Ал 2007-жылы айдоочулук күбөлүк алган. Учурда тийиштүү экспертизалар дайындалып, тергөө амалдары улантылууда", - деди басма сөз кызматынан.

Жол кыймылынын коопсуздугун камсыздоо башкы башкармалыгы айдоочуларга кайрылат. Жол эрежесин сактап, үйлөрдүн короосуна унааны токтотууда же айдап жатканда өспүрүмдөргө көңүл буруңуздар. Ата-энелер балдарыңыздар сейилдеп жүргөндө, үйдүн короосунда ойноп жатканда жол эрежесин сактоого үйрөтүп, коопсуздукту камсыз кылыңыздар. Жөө адамдар жолдон өтүүдө этият болуңуздар!