Бишкек шаарындагы Свердлов райондук сотунун алдында сот системине нааразы болгондордун митинги өтүп жатат

Бүгүн, 5-декабрда Бишкектеги Свердлов райондук сотунун алдында соттун акыйкат чечимин талап кылгандар нааразычылык акциясына чогулду. Алар ЖЭБди жаңылоодогу коррупция боюнча камалгандарга карата акыйкат чечим чыгаруу талабын коюп жатышат.

Чогулгандар Кыргыз өлкөсүндө сот реформасы жүргөнүнө карабай, соттук системде өзгөрүү байкалбай жатканын айтып нааразы болушууда.

Нааразычылык акциясына келгендердин арасынан Гүлбара Байтикова элдин үнү жетинчи кабатка жетпей жаткандыктан, адилеттүүлүк үчүн митингге чыгууга туура келгенин айтты.

"ЖЭБ боюнча сотко бир жарым жылдан бери катышып келе жатам. Анда жактоочулардын, күбөлөрдүн айткандары боюнча камакта отургандардын айыбы далилденген жок. Андай факты дагы табылган жок. Эгер Бишкек ЖЭБи өз учурунда модернизацияланып калбаганда, мындан дагы чоң авария болмок. Ошондо 386 миллион эмес, 386 миллиардга дагы ЖЭБ ордуна келмек эмес. Демек, ЖЭБ эң жакшы бүтүп, иштеп жатканы үчүн жалпы шаардыктарга үзгүлтүксүз жылуулук берилип жатат. Бул жакта камалып отурган балдардын баары эл үчүн кызмат кылгандар деп ойлойм. Мисалы, Сапар Исаков ЖЭБ долбоорун ишке ашырып жатканда, 20 саат иштеп, 4 саат гана уктап, иштегенин отурумдан уктук. Азыркы болуп жаткан кырдаал азыркы өкмөттүн туура эмес иши деп эсептейм. Мен эле эмес, бүткүл эл бүгүнкү сот системине нааразы болуп жатканын угуп келе жатабыз. Бул жакта отурган 8 адамдын тең күнөөсүз экени фактылар менен далилденди. Ак ишти, саясий куугунтук кылып жатышат", - деди ал.

Мындан тышкары, нааразычылык акциясынын катышуучулары камакта отургандарды социалдык тармактар аркылуу жамандап, жалган сөздөр тарап жатканын айтышты.

Маалым болгондой, сыртта акция өтүп жатканда, имараттын ичиндеги ЖЭБ боюнча отурумга катышкандар арасында дагы соттук процесстин жүрүшүнө нааразы болгондор чыкты. Алардын айтымында, отурумга келгендерди коридорго турууга уруксат бербей, 5 мүнөттүк тыныгуу учурунда дагы сыртка чыгарып салып жатышкандыктарын айтышты.