Караколдо жубайлар ортосунда чыр чыгып, күйөөсү аялына бензин чачып, өрт коюп жиберген

Ысык-Көл облусунун Каракол шаарында жарандык никедеги жолдошу жубайына бензин чачып, өрт коюп жиберген. Бул тууралуу облустук милициядан билдиришти.

Маалыматка ылайык, 4-январь күнү болжол менен саат 16:20 чамасында Каракол ШИИБинин нөөмөт бөлүмүнө Торгоев көчөсүндө жайгашкан эс алуу жайларынын биринин жанынан күйөөсү келинчегине бензин чачып, өрт коюп жибергендиги тууралуу маалымат түшкөн.

"Ыкчам тергөө тобу окуя болгон жерге барып, териштирүү жүргүзгөн. Анда Жети-Өгүз районунун Богатыровка айылынын 33 жаштагы тургуну Б.С. 35 жаштагы жарандык никедеги жолдошу Ч.Н. менен уруша кеткен. Анда күйөөсү аялынын бетине бензин чачып, күйгүзүп жибергенден кийин окуя болгон жерден качып кеткен. Келин алган жаракатынан улам, Ысык-Көл облустук бириккен ооруканасынын сыныктар бөлүмүнө жаткырылган. Аталган факт Каракол ШИИБинде Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Ал эми келиндин денесинен алган жаракаттарын аныктоо үчүн соттук-медициналык экспертиза дайындалган. Көрүлгөн тергөө-ыкчам иштеринин натыйжасында, аталган кылмышка шектүү Ч.Н. милиция кызматкерлери тарабынан колго түшүрүлүп, Каракол шаардык сотунун чечими менен 2 айга камакка алынды. Азыркы учурда тергөө иштери уланууда", - деп билдиришти басма сөз кызматынан.