Ырчы Самара Каримова Орусиянын Мамлекеттик Думасынан ыраазычылык баракча алды

Кыргыз Республикасынын Эмгек сиңирген артисти Самара Каримова Орусиянын Мамлекеттик Думасынын депутатынын ыраазычылык баракчасына ээ болду. Жакшы кабары тууралуу ырчы айым SUPER.KG порталына төмөнкүлөрдү билдирди.

"Мен Бириккен Араб Эмираттарындагы Дубай шаарында эс алып жүргөндө мага депутат Иван Белековдун жардамчысы байланышты. Кечээ, 23-январь күнү алардын чакыруусу менен Москвага бардык. Сыйлыкты Мамлекеттик Думанын жыйындар залында тапшырышты. Мени депутат Иван Белеков кабыл алып, эки өлкөнүн алакаларына токтолуп, маданият тармагындагы байланышты бекемдегениңиз үчүн деп алкыш айтты. Ошондой эле депутат Орто Азиядан алгачкылардан болуп Кремль сарайын толтуруп, Орусиядагы көрөрмандарга жакшы маанай тартуулап, өзгөчө концерт коюп кеткениңизди баалайбыз деди. Албетте, мен ыраазычылык кат алганыма абдан сыймыктанып турам. Анткени улуу державанын депутатынын колунан ыраазычылык кат алуу- бул сыймык эле эмес, менин чыгармачылыгыма болгон чоң урмат болду. Эмгегим, чыгармачылыгым элге арналат. Менин ушундай ийгиликтерге жетишиме күйөрмандарым себепчи. Анан калса менин чыгармачылыгымды жогорку деңгээлде баалаган Орусиянын депутаттарына ыраазычылык", - дейт Самара.