Министр: "Сауд Арабиядан келгендер текшерилген эмес деп күнөөлүүнү издебеш керек"

Бүгүн, 19-мартта саламаттыкты сактоо министри Космосбек Чолпонбаев журналисттерге коронавирус боюнча бүгүнкүгө карата абал тууралуу маалымат жыйын берди. Анын жүрүшүндө ага "Сауд Арабиядан умрадан келгендер медициналык текшерүүдөн өткөн эмес, бул үчүн ким күнөөлүү, ким жооп бериши керек?" деген суроо берилди.

"Умрадан келгендер Сауд Арабиясында жүргөн кезде эмираттар оору көп катталган өлкөлөрдүн катарына кирбейт болчу. Жалпы текшерүүнү 1-2-мартта эле баштаганбыз, учактан түшкөндөрдү дароо текшерүүгө алуу, карантинге жаткыруу жарандын келген өлкөсүнө карата жүргүзүлчү. Өлкөлөрдү кайсы өлкөдө оору көп катталып жатат, кайсы өлкөдө аз деп категорияларга бөлгөнбүз. Сауд Арабиясы андай категорияга кирбегенине карабай өзүбүз демилге көтөрүп текшерүүгө алалы дегенбиз. Бул жерде көп баш ийбестиктер да болгон, биз оорусу жок өлкөдөн, ыйык жерден келе жатабыз, тазабыз дешкендер бар болчу. Ага карабастан медициналык көзөмөлгө койгонбуз, антпесек азыр аларды табуу кыйын болмок. Ошол кездеги тартип менен чек арачылар да, медиктер да, айтор, бардык орган иш алып барган.

Бул жерден ким күнөөлүү деп күнөөлүүнү издебеш керек, коронавирус өлкөдөн чыгып жайылып жатса бир жөн, жуктуруп келип жатканын эске алуу зарыл. Андыктан баарыбыз жапа тырмак күрөшкөн туура", - деди министр.