10 миллион сомдон ашык пайда көрүшкөн. Балыкчыда каржы пирамидасын уюштурган деп шектелип 7 аял камакка алынды

Ысык-Көл облусунун Балыкчы шаарында финансылык пирамида оюндарын уюштурган деп шектелип 7 аял кармалды. Бул тууралуу облустук милициядан билдиришти.

Тергөөнүн алдын ала маалыматы боюнча, алар мыйзамсыз 10 миллион сомдон ашык пайда көрүшкөн. Кармалган жарандарга Жазык кодексинин 214-беренеси ("каржы пирамидаларын уюштуруу") коюлган.

"Жабырлануучулар Балыкчы шаарында орун алган "Ырыскы" жана "Ак-Куу" каржы мекемелери ири пайызда үстөк төлөп берерин убадалагандан улам, аталган мекемелерге акча каражаттарын салышкан. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Ыкчам иликтөө ишинде шектүү катары Балыкчы шаарынын тургундары 27 жаштагы Т. З., 28 жаштагы А.А., 38 жаштагы А.Ж., 31 жаштагы Т.Ч., 35 жаштагы Б.А., 51 жаштагы Б.Г., 55 жаштагы О.А. аттуу 7 аял кармалды. 18-август күнү соттун чечими менен кылмышка шектүү аялдар 2 айга камак алынышты.

Милиция кызматкерлери каржы пирамидасынын уюштуруучулары, көбүрөк кардарларды өздөрүнө тартуу үчүн, жаӊы тартылган кардарлардын эсебинен түшкөн акча каражаттарын алгач сүйлөшкөн пайыздык өлчөм менен төлөп келишкен. Андан кийин төлөмдөрдү токтотуп салышкан. Бүгүнкү күндө, эки каржы пирамидасы боюнча 143 арыз катталып, анын ичинен 132 тергөө жана 11 жоруктар багыттары боюнча тийиштүү иштер жүргүзүлүүдө. Ошондой эле алданып калган кардарлардан арыздар дагы да түшүүдө", - деп жазылат маалыматта.