Жансыз дене толук көмүлбөй калып, карга-кузгун жеп койгон. Жалал-Абадда дайынсыз болгон аялдын өлүмүнө шектүүлөр кармалды

Жалал-Абад шаарында дайынсыз болуп жаткан Бахтигул Базарматованын жансыз денеси таштандыда киши колдуу каза болуп, көмүлгөн жеринен табылды. Бул тууралуу облустук милициядан билдиришти.

26-ноябрь күнү Жалал-Абад шаарынын 36 жаштагы тургуну арыз менен кайрылып, 25-ноябрь күнү саат 15:30 чамасында жубайы 1978-жылы туулган Базарматова Бахтигул Сабировна Жалал-Абад шаарынан кызы менен коштошуп, үйүн көздөй кеткен боюнча үйүнө кайтып барган эместигин билдирген. Жалал-Абад ОИИБинин жетекчилигинин көзөмөлү астында тиешелүү иш-чаралар уюштурулган.

Жалал-Абад ОИИБинин жана Жалал-Абад ШИИБинин криминалдык милиция кызматынын кызматкерлери тарабынан жүргүзүлгөн ыкчам-иликтөө иштеринин натыйжасында 6-декабрь күнү дайынсыз болуп жаткан Бахтигул Базарматова киши колдуу болуп өлтүрүлгөн деген ыкчам маалымат алынган. Бул өзгөчө оор кылмыштын бетин ачуу максатында шек жараткан эки атуул аныкталып, ошол эле күнү жүргүзүлгөн иликтөө иш-чараларынын натыйжасында шектүүлөр кармалган. Алар 1981-жылы туулган Жалал-Абад шаарынын тургуну Х.И. жана Сузак районунун тургуну 1993-жылы туулган П.Ш. аттуу жарандар болушкан.

"Бул факты Кылмыштардын жана жоруктардын бирдиктүү реестрине катталып, сотко чейинки өндүрүш иши ачылган. Тергөөнүн жүрүшүндө шектүүлөр 25-ноябрь күнү сырттан тааныш болгон маркум аялга жолугушуп, саат 16:30 чамаларында Тойота-Авенсис унаасы менен Жалал-Абад шаарынын четиндеги ээн талаага алып барып, андан акча сурашкан. Маркум акча жок экендигин айткандан кийин шектүү И.Х. өзүнүн унаасында турган сүлгү менен аны муунтуп өлтүрүп, көтөрүп жүргөн сумкасындагы 32 миң сом акчасын жана тагынып жүргөн алтын буюмдарын алып, телефонун ыргытып жиберишкен.

Ал эми маркумдун жансыз денесин Жалал-Абад шаарынан 60-чакырым алыстыкта жайгашкан Сузак районунун Чангет-Сай дарыясынын жээгиндеги таштандыга көмүп коюшкан. Бирок ушул аралыкка чейин жансыз дене толук көмүлбөй ачык калган бөлүктөрүн карга-кузгун жеп койгондугу аныкталып, жансыз денеге карата тиешелүү экспертизалар дайындалган. Шектүүлөр жогорудагы жасаган кылмышын моюнуна алышып, окуя кандай болгондугу тууралуу жана жансыз денени көмүп койгон жерин көрсөтүп беришкен. Сотко чейинки өндүрүш иштин алкагында шектүүлөр убактылуу кармоочу жайга киргизилди", - деп билдирет басма сөз кызматынан.

Буга чейин Бахтигул Базарматова 25-ноябрь күнү саат 15:30 чамасында Жалал-Абад шаарынын Ленин жана Айтматов көчөлөрүнүн кесилишинде кызы менен коштошуп, үйүн көздөй кеткен боюнча дайынсыз болуп изделип жаткан.