Айзаданын апасы: "Тергөөчүлөр кызыңыз күйөөгө тийген турбайбы, той жейсиңер" деп айткан

SUPER.KG порталына ала качуунун курмандыгы болгон Айзада Канатбекованын апасы кызы тууралуу айтып берди. Апасынын айтымында, кыз бала менен Инстаграм аркылуу таанышкан.

"Ал бала кызымдын артынан ээрчип жүрчү экен, болбойт, жок дегенге көнбөй жатат деп көп айтчу. Кызым экөөбүз шаарда иштеп батирде турчубуз. Кызымдын өлүмүнө милициялардын шалаакылыгы түрткү болду. Биз аларга бардык далилдерди бери жатканыбызга карабай, "кызыңыз күйөөгө тийген турбайбы, той жейсиңер" деп тергөөчүлөр шылдыңдап, бул маселени олуттуу караган эмес", - деп билдирди апасы.

Ошондой эле апасы кызы бир жума аралыгында Түркияга учуп кетмек болгонун айтып, билеттин жарым акчасын ушул жума төлөөгө камданып жүргөнүн кошумчалады.

Окуянын чоо-жайы:

5-апрелде 3 адам 27 жаштагы Айзада Канатбекованы ала качып кетишкени белгилүү болгон. 7-апрелде Бишкек ШИИББи Канатбекованын жана аны ала качууга шектелгендердин биринин жансыз денеси унаадан табылганын билдирди. Ала качууга шектелгендердин бири 1992-жылы туулган Р.А. кармалып, Бишкек ШИИББинин убактылуу кармоочу жайына киргизилди.

Каза болгон кыз менен жигиттин сөөгүнө экспертиза дайындалды. Кийинчерээк Бишкек ШИИББинин жетекчилиги маалымат жыйын өткөрүп, Айзаданын өлүмүнө шектелген жаран 6 жылдан ашык түрмөгө отуруп чыкканын, үй-бүлөсү бар экенин маалымдады.

Бул окуядан кийин милиция кызматкерлеринин ишине нааразы болгон эл ИИМдин алдына митингге чыгышып, ички иштер министринин отставкасын талап кылышты.