Видео байкоо жүрүп жатканын байкабаган 27 жаштагы адам 7 жаштагы баланы тээп салган (видео)

Чүйдө 7 жаштагы баланын денесине залал келтирди делген жаран кармалды. Бул тууралуу облустук милициянын маалымат кызматынан билдиришти.

Маалыматка ылайык, кечээ, 20-апрель күнү Ысык-Ата РИИБине Люксембург айылынын 1992-жылы туулган тургуну арыз менен кайрылган. Анда ошол эле күнү болжол менен саат 18:30 чамасында 7 жаштагы баласынын денесине аталган айылдагы дүкөндөрдүн биринин алдында белгисиз бирөө залал келтиргенин жазган.

Бул окуя Кылмыштардын жана жоруктардын бирдиктүү реестрине 266-берене "бейбаштык" менен катталган.

Издөө иш-чараларынын натыйжасында, жогорудагы окуяга шектелип 27 жаштагы жаран кармалган. Учурда бардык зарыл болгон экспертизалар дайындалып, кармалган жаран убактылуу кармоочу жайга камакка алынган. Сотко чейинки өндүрүш иштери улантылып жатканын кошумчалашты.