"Өздөрүн жогорку кызматтагы адам катары тааныштырган". ИИМ телефон аркылуу алдамчылык кылганга шектүүлөрдү кармады

ИИМ өздөрүн жогорку кызматтагы адамдар катары тааныштырып, алдап жүргөн адамдарды кармады. Бул тууралуу мекеменин маалымат кызматынан кабарлашты.

Маалыматка ылайык, 2020-жылдын кыш айында укук коргоо органдары телефон алдамчылыгы фактысы боюнча иликтөөлөрүн жүргүзө баштаган.

Кызматтык орундардан жогорулатуу шылтоосу менен ал ар кандай жооптуу кызматтагы адамдарга чалып жүргөн. Бир жолу ал министрликтердин биринин кабылдамасына чалып, өзүн “мамлекеттик органдардын аппаратынын” кызматкери катары тааныштырып, аны менен байланышуусун талап кылган. Кылмышкердин мындай ыкмасы көп учурда иштеп, аларга кайра чалып жүрүшкөн. Андан соң телефон менен сүйлөшүүдө “жогорку кызматтагы адамдан” маселени чечүү үчүн жардам берүүнү суранган. Бирок башында алдамчылардын кылтагына илинип калганын эч ким түшүнгөн эмес.

Жабырлануучу кийинчерээк арыз менен ички иштер органдарына кайрылган.

Телефон алдамчылыгына шектүүнүн аты-жөнү такталган. Ал Жазаларды аткаруу кызматынын мекемелеринин биринде жазасын өтөп жаткан, мурда алдамчылык үчүн 5 жолу соттолгон 1987-жылы туулган К.Т. болуп чыккан.

Ошондой эле ал ушул жылдын январь айында өзүн “жогорку кызматтагы адамдын” ишенимдүү адамы катары тааныштырып, Бишкек шаарынын жашоочусуна чалып, кызматтык орундардан жогорулатууга сөз берип, бир иш-чарага чакырып, электрондук капчыкка 20 миң сом акча каражатын которууну суранган. Текшерүү учурунда эч кандай иш-чара уюштурулбаганы белгилүү болгон.

Аталган факты боюнча телефон чалууларын жүзөгө ашырган адамдарды аныктоо максатында ыкчам иликтөө иш-чаралары жүргүзүлдү.

Бүгүн, 10-февраль күнү ИИМдин Кылмыш иликтөө башкы башкармалыгынын 3-башкармалыгынын кызматкерлери тарабынан Жазаларды аткаруу кызматынын мекемелеринин биринде тинтүү жүргүзүлдү. Анда жазасын өтөп жаткандардын бөлмөлөрүнөн уруксат берилбеген буюмдар 4 уюлдук телефон табылып алынган.

Башка алдамчылык фактыларын иликтөөнүн алкагында 1 миллион 200 миң сомдук алдамчылык фактыларына тиешеси бар мурда соттолгон Чүй облусунда 1995-жылы туулган жаран М.у.Р. аныкталды.

Чүй облусунда 1979-жылы туулган дагы бир шектүү Ю.З. алдамчылыктын 36 эпизоду боюнча соттолгон. Ал 3 миллион 500 миң сомдук чыгашага дуушар кылган телефондук алдамчылыкка катышы бар. Башында ыкчам иш-чараларды жүргүзүү учурунда дагы бир соттолгон жаран 1981-жылы туулган А.М. аныкталып, андан бир нече уюлдук телефон табылган. Ал дагы телефон алдамчылыгына шектелүүдө.

ИИМ жарандарга айрым бейтааныш номерлер менен чалуу болгондо сак жана этият болууну, чоочун адамдарга акча каражатын которбоону эскертет.