Иран бийлиги өлкөнүн жогорку лидери тууралуу маалымат берди

Ирандын жогорку лидери Моджтаба Хаменеи АКШ жана Израилдин соккуларынан жаракат алып, учурда сакайып жатат. Бул тууралуу чет элдик басылмалар өлкөдөгү өкмөттүк жыйындардын координатору Мазахер Хосейниге таянып жазышты.

Анын айтымында, Хаменеи тизесинен, белинен жана кулагынын арт жагынан жеңил жаракат алган. Учурда абалы жакшы экени айтылды.

“Белиндеги жаракат айыкты, тизеси да жакында жакшы болот. Учурда ден соолугу туруктуу”, - деп билдирген Хосейни.

Ошондой эле ал Хаменеи эл алдына “ылайыктуу учурда” чыгарын кошумчалаган.

The Wall Street Journal басылмасы Иран бийлиги жаңы жогорку лидердин жаракаттары тууралуу биринчи жолу ачык маалымат берип жатканын белгиледи.

Айта кетсек, Моджтаба Хаменеи жогорку лидерлик кызматка атасы каза болгондон кийин келген. Ал март айынан бери коомчулукка чыккан эмес.