Дональд Трамп Ормуз кысыгындагы операцияны кайра баштоону карап жатат

АКШнын президенти Дональд Трамп Ормуз кысыгында кемелердин коопсуз жүрүшүн камсыз кылууга багытталган “Эркиндик” операциясын кайра жандандырууну карап жатканын америкалык Fox News телеканалы жазып чыкты.

Маалыматка ылайык, Трамп менен болгон телефон маектен кийин алып баруучу президент бул жолу операциянын масштабы кеңейип, аскердик компоненттер көбүрөөк роль ойношу мүмкүн экенин айтканын билдирген.

Ошондой эле Трамп АКШ Иран менен дипломатиялык сүйлөшүүлөрдө “жакшы позицияда” деп эсептээрин кошумчалаган.

Буга чейин АКШнын Аскер-деңиз күчтөрү 13-апрелде Ормуз кысыгы аркылуу өтүүчү деңиз каттамдарына байланыштуу чараларды күчөткөнү кабарланган. Бул кысык дүйнөлүк мунай жана газ ташууларынын болжол менен 20 пайызы өтүүчү маанилүү маршрут болуп эсептелет.

Иран тарап буга чейин кысыктан өтүү үчүн расмий төлөм киргизилгенин тастыктаган эмес, бирок мындай мүмкүнчүлүк талкууланганын билдирген.