Эбола вирусуна кабылгандардын дүйнөлүк саны тууралуу маалымат берилди 

Бүткүл дүйнөлүк саламаттык сактоо уюму эбола вирусу тууралуу дүйнөдөгү акыркы кырдаал тууралуу маалымат берди. Бул тууралуу чет элдик басылмалар жазышты.

Маалыматка ылайык, аталган уюмдун башчысы Тедрос Аданом Гебреисус Женевада өткөн Бүткүл дүйнөлүк саламаттык сактоо ассамблеясынын сессиясында сүйлөп жатып, учурда эбола оорусуна кабылган 500дөн ашык учур катталганын жана 130дан ашык адам каза болгонун билдирген.

Буга чейин Конго өлкөсүнүн чыгышында эбола вирусунан каза болгондордун саны 91ге жеткени айтылган. Учурда аталган аймакта 350гө жакын адамдан вирус аныкталып, 59 бейтап дарыланууда. Мындан тышкары, оору Түштүк Судан жана Уганда аймактарында катталууда.

Маалымат үчүн:

Эбола - өтө кооптуу вирустук инфекция болуп эсептелет. Бул вирус биринчи жолу 1976-жылы Африкада, Конго Демократиялык Республикасында жана Судан аймактарында катталган. Оорунун табигый булагы катары жарганаттар, маймылдар саналат. Вирус аталган жаныбарлар аркылуу адамга жугушу мүмкүн. Ал эми адамдан адамга кан, дене суюктуктары же булганган буюмдар аркылуу жугат. Ошондуктан оорулуу адамга жакын байланышта болуу эң чоң коркунуч жаратат.