Адылбек Касымалиев тоо-кен тармагында иш жүргүзгөн кытайлык инвесторлорду кабыл алды

Кечээ, 29-майда министрлер кабинетинин төрагасы Адылбек Касымалиев тоо-кен тармагында иш жүргүзгөн “Hunan Global South Industry” кытайлык компаниясынын өкүлү Хэ Руцю баштаган инвесторлорду кабыл алды.

Президенттик администрация билдиргендей, жолугушууда өлкө аймагында геологиялык чалгындоо долбоорлорун ишке ашыруунун мүмкүнчүлүктөрүн кароо маселелери сүйлөшүлдү.

Инвесторлор геологиялык чалгындоо иштерин жүргүзүүгө, заманбап технологияларды киргизүүгө, инфраструктураны өнүктүрүүгө, кадрларды даярдоого жана жаңы жумуш орундарын түзүүгө багытталган олуттуу инвестиция салууга даяр экендигин билдиришти.

Инвесторлордун сунуштарын уккан Касымалиев мамлекет маанилүү минералдар, полиметаллдар жана сейрек кездешүүчү элементтер тармагындагы долбоорлорду ишке ашыруу үчүн чет элдик инвесторлорду тартууга кызыкдар жана иштешүүгө даяр экенин белгилеп, тиешелүү тапшырмаларды берди.

Жолугушуунун соңунда мындан аркы инвестициялык эки тараптуу долбоорлорду ишке ашыруу үчүн Жаратылыш ресурстары, экология жана техникалык көзөмөл министрлиги жана “Кыргызгеология” мамлекеттик ишканасы менен кызматташуунун мүмкүн болгон форматтарын талкуулап, иш жүргүзүү макулдашылды.