Түштүк кореялык ырчы PSY түрмөгө кесилиши мүмкүн

Дүйнөгө белгилүү кореялык ырчы PSY (чыныгы аты Пак Чэ Сан), “Gangnam Style” аттуу хит ырынын аткаруучусу, психотроптук дарылар тууралуу мыйзамды бузган деген шек менен териштирүүгө алынууда. Бул тууралуу чет элдик басылмалар жазышты.

Маалыматтарга караганда, ырчы 2022-2025-жылдары өзүнүн менеджерин жана башка адамдарды Сеул шаарындагы ооруканалардын бирине жөнөтүп, уйкусуздук, тынчсыздануу жана депрессияны дарылоого арналган психотроптук дарыларга рецепт алдырган деп шектелүүдө. Ал эми өзү дарыгердин жеке кароосунан өтпөгөнү айтылууда.

Түштүк Кореянын мыйзамдары боюнча мындай дары-дармектерге рецепт бейтапты жеке текшерген дарыгер тарабынан гана жазылат жана аны ошол бейтаптын өзү гана пайдалана алат.

Эгер күнөөсү далилденсе, PSY бир жылга чейин эркинен ажыратылышы мүмкүн.