Иран менен АКШ Ормуздун аймагында бири-бирине сокку жасашты

3-июнга караган түнү Иран менен АКШ Ормуз кысыгынын аймагында өз ара аскердик соккуларды жасашты. Окуя ок атышууну токтотуу боюнча келишим күчүндө турган учурда болгон. Бул тууралуу чет элдик басылмалар жазышты.

Маалыматка ылайык, жарылуулар Иранга караштуу Кешм аралынын аймагында катталган. Ислам революциясынын сакчылар корпусу үч ракета "душмандын аскердик объекттерине" тийгенин расмий жарыялады.

Ал эми АКШнын соккусунун негизги бутасы Ирандын аскер күчтөрүн башкаруучу жердеги борбор болгон. Вашингтон бул соккуларды Жакынкы Чыгыштагы америкалык кызыкчылыктарга каршы болгон ирандык чабуулдардын алдын алуу аракети катары түшүндүргөн.

Өз кезегинде Иран дагы АКШнын аскердик объекттерин бутага алганын жарыялады. Ирандык маалымат каражаттарынын билдирүүсүндө АКШнын аскер базасына жана 5-флотунун штабына ракета жана дрондор менен сокку урулганы айтылат.

Мындан тышкары, Иран тарап америкалыктар менен байланышы бар деп эсептелген "Паная" аттуу кемеге чабуул жасалганын билдирди. Учурда эки тараптан тең жоготуулар же кыйроолор тууралуу расмий маалымат бериле элек.

Окуядан кийин Бахрейнде коопсуздук чаралары күчөтүлүп, тургундарга коопсуз жайларга көчүү сунушталды.